Memar Elçin Əliyev noyabrın 6-da prezident İlham Əliyevin açılışını etdiyi Cəbrayıl rayonunun Soltanlı kəndinin baş planını tənqid edib.
O, sosial media hesabında layihənin Macarıstanın “KESZ Group” şirkəti və “BakıDövlətLayihə” layihə institutunun memarları tərəfindən birgə hazırlandığını bildirib.
Memarın sözlərinə görə, layihələndirmənin dəyəri barədə məlumat ictimaiyyətə açıqlanmayıb.
“Layihələndirmənin dəyəri barədə maliyyə məlumatları geniş ictimaiyyət üçün əlçatmaz olaraq qalır və gizli saxlanılır. Belə primitiv layihəyə mən bir manat da verməzdim”, – o yazıb.
Memar kəndin planlaşdırılmasını “monoton” adlandıraraq, küçələrin düzbucaqlı şəbəkə üzrə qurulduğunu, məkan müxtəlifliyi və memarlıq ifadəliliyinin olmadığını qeyd edib.
“Düşünürəm ki, dövlət başçısının bu kəndə səfərini təşkil edən məmurlar prezidenti ciddi şəkildə pis vəziyyətdə qoyublar. Xalqımıza müasir, rahat və hərtərəfli yaşayış mühiti əvəzinə, planlaşdırma quruluşu konsentrasiya düşərgəsini xatırladan kazarma tipli məskunlaşma prinsipi təklif olunur”, – paylaşımda bildirilib.
O, layihəçilərin müasir yaşayış məntəqəsi yaratmaq əvəzinə “ərazidə yaşayış qutularını mexaniki şəkildə yerləşdirdikləri” qənaətində olduğunu yazıb.
Memar həmçinin layihənin hazırlanmasına nə qədər dövlət vəsaitinin xərcləndiyi və layihəni təsdiqləyən şəxslər barədə məlumatların açıqlanmasının vacibliyini vurğulayıb.
“Cəmiyyət bu qədər şübhəli nəticəyə nə qədər dövlət vəsaitinin xərcləndiyini bilməyə haqlıdır”, – o bildirib.
