Leş ət iddialarından milyonluq obyektlərə: Bərdədə Samir Novruzovun varidatı necə yaranıb?
Bərdədə Novruzov Samir Seyfəddin oğlunu tanımayan az adam tapılar. Onun adı illər əvvəl heyvan mənşəli ətin tədarükü ilə bağlı müxtəlif iddialarda da hallanıb. Həmin dövrdə baytarlıq və hüquq-mühafizə orqanları tərəfindən tədbirlər görüldüyü barədə məlumatlar səsləndirilib.
Bu gün isə qarşıda başqa sual dayanır: bu fəaliyyətlə başlayan yol necə oldu ki, milyonlarla manatlıq biznesə çevrildi?
Məlumatlara görə, Samir Novruzovun Bərdədə bir sıra iri obyektləri var. Onların arasında dəyərinin təxminən 2 milyon manat olduğu iddia edilən otel, “Tacir” və “Qızıl Tac” şadlıq sarayları, “Qızıl Tac” mebel evi və digər kommersiya obyektləri göstərilir.
Siyahını uzatmaq mümkündür. Amma bu gün üçün bu qədər kifayətdir.
Əsas məsələ isə obyektlərin çoxluğu deyil. Əsas məsələ bu bizneslərin real dövriyyəsi və dövlət qarşısında öhdəliklərin necə yerinə yetirilməsidir.
İctimaiyyətin haqlı olaraq sualları var:
Müştərilərə bütün obyektlərdə kassa çeki verilirmi?
Obyektlərdə çalışanların hamısının əmək müqaviləsi varmı?
İşçilərin sosial sığorta haqları tam ödənilirmi?
Əməkhaqqı ödənişləri rəsmiləşdirilirmi?
Şadlıq saraylarında qida təhlükəsizliyi ilə bağlı yoxlamalar nə dərəcədə mütəmadi aparılır?
Bu obyektlərin illik dövriyyəsi nə qədərdir və dövlət büdcəsinə nə qədər vergi ödənilir?
Və ən əsası:
Bu qədər böyük əmlak və biznes portfelinin formalaşması ilə bağlı aidiyyəti dövlət qurumları hər hansı araşdırma aparıbmı?
Əgər bütün fəaliyyət qanun çərçivəsindədirsə, cavab vermək çətin olmamalıdır.
Biz kimisə məhkəməsiz ittiham etmirik. Sadəcə ictimai maraq doğuran suallar veririk və aidiyyəti qurumlardan faktlarla cavab gözləyirik.
Samir Novruzovun da mövqeyini açıqlamaq hüququ var. Qarşı tərəfin cavabını dərc etməyə hazırıq.
Növbəti yazıda isə Novruzovun digər obyektləri, onların fəaliyyəti və ictimaiyyətə açıq mənbələrdə görünən məlumatlar barədə danışacağıq.
Suallar çoxdur. Cavablar isə hələ yoxdur..
