Hesablama Palatası 14 yerli icra hakimiyyətinin yol təmiri layihələrində ciddi maliyyə və satınalma pozuntuları aşkarlayıb.
Auditin nəticələrinə görə, layihələrin dəyərinin şişirdilməsi nəticəsində podratçı şirkətlərə ümumilikdə 1 milyon 78,6 min manat artıq ödəniş edilib.
Altı icra hakimiyyəti 6 milyon 291,2 min manatlıq satınalma müqaviləsi bağlasa da, işlərin tenderlərdən əvvəl başladığı müəyyən olunub.
Bəzi hallarda müqavilə imzalandıqdan cəmi 1-2 gün, ən çoxu 4 gün sonra işlərin başa çatdığına dair aktlar rəsmiləşdirilib.
Hesablama Palatası bunun tenderlərin formal xarakter daşıdığını göstərdiyini bildirir:
“Bütün bu nöqsanlar dövlət satınalmalarında rəqabətlilik və şəffaflıq prinsiplərinə, eləcə də vəsaitlərdən qənaətlə istifadə tələbinə riayət olunmadığını göstərir”.
Audit zamanı yol təmiri üçün tələb olunan bir sıra texniki sənədlərin də hazırlanmadığı müəyyən edilib.
Bəzi layihələrdə suyun yollardan kənarlaşdırılması nəzərə alınmayıb. Palata bunun yollarda su və çökəkliklərin yaranmasına, yol örtüyünün ömrünün azalmasına və əlavə təmir xərclərinə səbəb ola biləcəyini qeyd edir.
Həmçinin müqavilə öhdəliklərini vaxtında yerinə yetirməyən podratçılara cərimələrin tətbiq olunmadığı aşkarlanıb.
2024-2025-ci illərdə dövlət vəsaiti hesabına tikilən və ya əsaslı təmir olunan, ümumi dəyəri təxminən 24 milyon manat olan yol aktivləri isə mühasibat uçotunda göstərilməyib.
Audit Quba, Tərtər, İmişli, Qusar, Ağcabədi, Zaqatala, Lerik, Şabran, Gədəbəy, Ucar, Cəlilabad, Mingəçevir, Lənkəran və Şəki icra hakimiyyətlərini əhatə edib.
